Dydd Gwener, 27 Gorffennaf 2012
Mae Iechyd Cyhoeddus Cymru yn ymchwilio i ddau achos o lid yr ymennydd meningococaidd ymysg plant sy’n mynychu Meithrifa Blue Door yng Nghaerdydd.
Hysbyswyd Iechyd Cyhoeddus Cymru am yr achos cyntaf ddechrau mis Gorffennaf. Anfonwyd llythyrau at rieni ar y pryd i’w cynghori am arwyddion a symptomau llid yr ymennydd.
Hysbyswyd Iechyd Cyhoeddus Cymru am ail achos ar 25 Gorffennaf.
Meddai Dr Gwen Lowe, Ymgynghorydd mewn Rheoli Clefydau Trosglwyddadwy, Iechyd Cyhoeddus Cymru: “Gallai cael dau hysbysiad gan yr un feithrinfa mewn cyfnod o bedair wythnos olygu bod y clefyd wedi cael ei drosglwyddo yn y feithrinfa.
“Caiff bacteria sy’n achosi llid yr ymennydd meningococaidd eu cario yng nghefn gwddf llawer o bobl iach. Gellir trosglwyddo’r germ i eraill drwy gysylltiad agos am gyfnod maith â rhywun sy’n ei gario, a hynny fel arfer mewn cartrefi. Yn achlysurol gall y germ achosi salwch mewn person iach pan ddaw i gysylltiad ag ef.
“Felly, fel cam rhagofalus, rydym yn cynnig gwrthfiotigau i bob plentyn ac aelod o staff yn y feithrinfa i leihau’r risg y bydd rhagor o achosion yn codi.
“Bydd y gwrthfiotig yr ydym yn ei argymell yn clirio’r germ o gefn gwddf unrhyw un yn y feithrinfa a allai fod wedi ei ddal. Ond ni fydd yn atal salwch mewn rhywun sydd eisoes wedi cael ei heintio felly cynghorir rhieni i fod yn ymwybodol o’r arwyddion a’r symptomau a cheisio cymorth meddygol os ydynt yn bryderus.
“Gallai’r symptomau hyn gynnwys cur pen, twymwn, teimlo’n swrth, chwydu, stiffrwydd yn y cyhyrau ac o bosibl brech gochlyd nad yw’n diflannu pan fydd gwydryn yn cael ei bwyso yn ei herbyn. Ni fydd pob un o’r symptomau i’w gweld o reidrwydd.”
Am fwy o wybodaeth ewch i:
Mae rhagor o wybodaeth ar gael o:
- Ymddiriedolaeth Llid yr Ymennydd - www.meningitis-trust.org 0800 028 1828
- Sefydliad Ymchwil i Lid yr Ymennydd – www.meningitis.org 0808 800 3344
- Galw Iechyd Cymru – www.nhsdirect.wales.nhs.uk 0845 46 47
Ffynhonnell:
Iechyd Cyhoeddus Cymru
