Mae'r cyngor a'r cymorth ymarferol a gynigir ganddi'n helpu pobl i ymdopi â'r straen mawr a achosir gan ganser.
Ers mis Mai 2007, mae'r Ganolfan wedi'i lleoli ar safle dros dro a ddarparwyd gan Ymddiriedolaeth GIG Prifysgol Abertawe Bro Morgannwg. Bydd yn symud i adeilad pwrpasol newydd gwerth £1.7 miliwn yn yr ysbyty, yn gynnar y flwyddyn nesaf. Ariannwyd yr adeilad newydd gan gyfraniadau elusennol.
Meddai Edwina Hart:
Mae'n bleser cael ymweld â'r ganolfan i weld pa gymorth sydd ar gael i gleifion, eu teuluoedd a'u cyfeillion ar adeg mor anodd yn eu bywydau.
Bydd canser wedi effeithio mewn rhyw ffordd ar bron pawb yng Nghymru. Mae ffigurau'n dangos y bydd un o bob tri pherson yng Nghymru yn cael rhyw fath o ganser yn ystod eu bywydau.
Mae ein hymdrechion yn canolbwyntio ar atal canser, canfod y clefyd yn gynnar, a'i gwneud yn hawdd cael triniaeth a chefnogaeth o ansawdd da, a hynny i leihau effaith canser a gwella'r cyfraddau goroesi. Yr wythnos diwethaf, cyhoeddais raglen waith ar gyfer y tair blynedd nesaf i wella ymhellach wasanaethau i gleifion canser. Mae gan y sector gwirfoddol, a chanolfannau fel hyn, ran werthfawr i'w chwarae wrth gefnogi ac ategu gwaith y GIG o ran darparu help a chymorth i bobl sy'n byw gyda chanser.