Dydd Gwener, 3 Awst 2012
Mae Gwasanaeth Diogelu Plant Iechyd Cyhoeddus Cymru wedi cyhoeddi y bydd yn cynnal cynhadledd ddydd Mercher 12 Medi.
Bydd y digwyddiad yn gyfle i rannu dysg o gyngres BASPCAN (Cymdeithas Prydain ar gyfer Astudio ac Atal Cam-drin ac Esgeuluso Plant) a gynhaliwyd yn Belfast yn gynharach eleni.
Fe’i cynhelir ar Faes y Sioe Frenhinol yn Llanfair-ym-Muallt, mae’n costio £25 y pen i fynychu ac mae wedi’i hanelu at bob ymarferydd yng Nghymru sydd â diddordeb mewn diogelu plant.
Ymysg y pynciau trafod bydd:
- Cymorth i deuluoedd mewn angen
- Gwersi i’r GIG ac i Gymru yn sgil adolygiadau o achosion difrifol
- Ymchwiliadau i’r clwstwr hunanladdiad honedig ym Mhen-y-bont ar Ogwr rhwng 2007 a 2008
- Cynnwys tadau mewn gwaith diogelu plant
- Adnabod plant cyn oedran ysgol sy’n cael eu cam-drin a’u hesgeuluso
- Plant sy’n cael eu lladd neu eu cam-drin yn ddifrifol er gwaetha’r ffaith bod eu lles yn nwylo’r llys teulu
Meddai Daphne Rose, Nyrs Ddynodedig Diogelu Plant, Iechyd Cyhoeddus Cymru: “Mae’r gynhadledd hon yn gyfle i ymarferwyr sy’n gweithio ym maes diogelu plant ystyried themâu’r gyngres a gynhaliwyd ym mis Ebrill a sut y maent yn berthnasol i’r rhai ohonom sy’n gweithio yng Nghymru.
“Byddwn yn trafod nifer o bynciau pwysig yn ymwneud â diogelu lles plant yng Nghymru a gobeithiwn glywed barn cymaint o weithwyr iechyd proffesiynol â phosibl.”
Dylid archebu lleoedd ar gyfer y gynhadledd erbyn 31 Awst drwy lenwi’r ffurflen.
Mae rhagor o wybodaeth am Wasanaeth Diogelu Plant Iechyd Cyhoeddus Cymru ar gael yn: http://www.wales.nhs.uk/sitesplus/888/tudalen/44081
Ffynhonnell:
Iechyd Cyhoeddus Cymru
