Dydd Gwener, 2 Mawrth 2012
Mae Bwrdd Iechyd Hywel Dda wedi ymestyn hyd a lled ei ymarfer gwrando, sef Eich Iechyd, Eich Dyfodol.
Cafodd y Bwrdd Iechyd gyfarfod heddiw (dydd Iau 1 Mawrth) â chynrychiolwyr gwahoddedig o’r Cyngor Iechyd Cymuned a’r Grŵp Cyfeirio Rhanddeiliaid, er mwyn adolygu cynnydd yr ymarfer gwrando hyd yma.
Bydd staff, rhanddeiliaid ac aelodau’r cyhoedd yn cael cyfle i fynegi eu barn a rhoi adborth am fis ychwanegol, hyd ddiwedd mis Ebrill.
Bydd rhagor o ddigwyddiadau ‘Cwrdd â’r Bwrdd Iechyd’ hefyd yn cael eu cynnal yn Sir Gaerfyrddin, Ceredigion a Sir Benfro. Bydd y dyddiadau'r cael eu cynllunio a’u hysbysebu’n eang, ac yn cael eu cynnal yng Nghaerfyrddin, Llanymddyfri, Dinbych-y-pysgod/Saundersfoot a De Ceredigion. Caiff y rhain eu cynnal yn ystod y prynhawn a’r noswaith gynnar er mwyn cyd-fynd ag ymrwymiadau pobl sy’n gweithio rhwng 9am a 5pm.
Dywedwyd diolch wrth aelodau staff y Bwrdd Iechyd am y gwaith gwrando ac ymgysylltu eang sydd eisoes wedi’i wneud, er y cydnabuwyd y gellid gwneud mwy er mwyn cryfhau’r ymarfer, er enghraifft cynnal digwyddiadau gyda’r hwyr.
Dywedodd Chris Martin, Cadeirydd y Bwrdd Iechyd: “Mae wedi bod i’r amlwg bod pobl yn ei chael yn anodd gwahaniaethu rhwng ‘ymgynghori’ a ‘gwrando ac ymgysylltu’. Mae pobl am wybod beth sy’n mynd i ddigwydd i’w hysbyty lleol, ac rydym yn deall y rhwystredigaeth, ond cyfnod o wrando yw hwn fel y gallwn ganfod barn pawb, a'i defnyddio er mwyn eu cynnwys mewn unrhyw gynigion a fyddai'n cael eu cynnig mewn ymgynghoriad ffurfiol yn hwyrach eleni.
“Rydym am i’n staff, ein rhanddeiliaid a’r cyhoedd achub ar y cyfle hwn i ddarparu gwasanaeth iechyd cynaliadwy sydd gyda’r gorau yn y byd ar gyfer y dyfodol."
Hyd yma, mae’r gweithgareddau wedi cynnwys (er nad hynny yw’r cyfan):
- Dosbarthu pamffled a DVD ‘yr achos dros newid’ i bob cartref
- Wyth digwyddiad ‘Cwrdd â’r Bwrdd Iechyd’ a fynychwyd gan dros 1,100 o bobl
- Chwe phrif sioe deithiol i staff, a fynychwyd gan dros 650 o staff
- Dros 10,000 o drawiadau ar yr adnodd ar-lein
- Anfon dros 1,100 set o ddogfennau at randdeiliaid allweddol a sicrhau eu bod ar gael mewn lleoliadau cymunedol fel meddygfeydd a llyfrgelloedd
- Cyfarfodydd â Chyngor Llawn pob awdurdod lleol a threfnu consortia sirol â Chynghorau Tref a Chymuned
- Cyfarfodydd wedi’u cynnal, neu’u trefnu, â’r tri phrif grŵp ymgyrchu
- Cefnogodd y Bwrdd Iechyd ddigwyddiad a gynhaliwyd gan Fwrdd Iechyd Lleol Prifysgol Betsi Cadwaladr ym Mhorthmadog ddoe (dydd Mercher 29 Chwefror)
- Bydd y Bwrdd hefyd yn cefnogi digwyddiadau pellach y mae Bwrdd Iechyd Lleol Powys yn eu trefni ym Machynlleth a Llanidloes ddydd Llun 5 Mawrth.*
Dywedodd Aelod Annibynnol o’r Bwrdd, Jane Jeffs: “Mae’r ymarfer gwrando ac ymgysylltu wedi bod mor dda â’r disgwyl ac yn well nag unrhyw beth rwyf wedi’i weld o’r blaen.”
*Cynhelir digwyddiad Machynlleth yn Y Plas rhwng 3.30pm a 5pm ddydd Llun 5 Mawrth. Cynhelir digwyddiad Llanidloes yng Nghanolfan Gymunedol y dref rhwng 7pm ac 8.30 ddydd Llun 5 Mawrth
Ffynhonnell:
Bwrdd Iechyd Hywel Dda
