Mae staff y GIG yn achub bywydau bob dydd – bydd 1000 o Fywydau a Mwy yn helpu i achub rhagor

Mae’n cyd-redeg ag un ar ddeg o raglenni cenedlaethol eraill mewn fframwaith pum mlynedd i wneud newidiadau a fydd yn trawsnewid y ffordd y darperir gwasanaethau iechyd yng Nghymru.

 

Mae pob bwrdd ac ymddiriedolaeth iechyd yng Nghymru yn rhan o 1000 o Fywydau a Mwy, sy’n cyflwyno ffyrdd newydd o weithio i wella gofal drwy leihau niwed, gwastraff ac amrywiadau. Mae hefyd yn ymrwymedig i gyflymu’r newid er mwyn sicrhau bod arferion da yn lledaenu o’r naill ward i’r llall, o’r naill feddygfa i’r llall ac o’r naill sefydliad i’r llall.

 

Ar hyn o bryd mae 1000 o Fywydau a Mwy yn gweithredu’r rhaglen mewn pedwar ar ddeg o feysydd. Maent yn cynnwys: gwella gwasanaethau strôc, lleihau cwympiadau yn y gymuned, adferiad cyflymach ar ôl llawdriniaeth a gwell triniaeth i’r rhai sy’n dioddef o anhwylderau iechyd meddwl.

 

Mae’r rhaglen yn cydnabod bod staff sydd ar y rheng flaen mewn sefyllfa dda i ddarparu gofal o’r safon y mae pob claf ei angen, ym mhob man, bob amser. “Gwyddom fod staff GIG Cymru’n ymrwymedig i wella diogelwch ac ansawdd y gofal y maent yn ei ddarparu. Mae 1000 o Fywydau a Mwy yn rhoi cyfle i’r gwaith hwnnw barhau”, meddai Dr Alan Willson, cyfarwyddwr y rhaglen.

 

 

Mae 1000 o Fywydau a Mwy yn adeiladu ar waith yr Ymgyrch 1000 o Fywydau, a gynhaliwyd rhwng Ebrill 2008 ac Ebrill 2010. Am fwy o wybodaeth am yr Ymgyrch, darllenwch adroddiad 'Dwy flynedd i wneud gwahaniaeth i Ofal Iechyd yng Nghymru' (PDF).