Cwestiynau Cyffredin – Presgripsiynau am ddim

Pwy fydd â'r hawl i gael presgripsiynau am ddim?

Bydd pawb sydd â meddyg teulu yng Nghymru neu gleifion yng Nghymru sydd â meddyg teulu yn Lloegr a cherdyn hawl, yn gallu cael presgripsiynau am ddim, ar yr amod mai fferyllydd yng Nghymru sy'n rhoi eu meddyginiaeth iddynt. Bydd meddygon teulu, deintyddion a phresgripsiynwyr annibynnol fel nyrsys a fferyllwyr yn parhau i asesu, ar sail glinigol, a fydd claf yn elwa o feddyginiaeth ar bresgripsiwn i wella ei (h)iechyd.

Yn ogystal â phresgripsiynau am ddim, bydd y taliadau a godir am wigiau a chyfarpar yn cael eu diddymu. Os yw claf yn cael y gwasanaethau hyn gan Ymddiriedolaeth GIG yn Lloegr, dylai'r Bwrdd Iechyd Lleol dalu'r costau.

Beth sy'n digwydd os bydd cleifion o Gymru'n cyflwyno'u presgripsiwn mewn fferyllfa yn Lloegr?

Bydd cleifion y cyflenwir eu presgripsiynau y tu allan i Gymru yn gorfod talu'r cyfraddau a godir yn y wlad honno, os nad oes ganddynt hawl i gael presgripsiwn am ddim o dan reoliadau'r wlad honno, er enghraifft oherwydd eu hoedran neu fod arnynt gyflwr meddygol neilltuol.

Os yw claf eisoes wedi talu am dystysgrif rhag-dalu a fydd yn cael ad-daliad?

Bydd. Ni fydd angen tystysgrifau rhag-dalu ar gleifion ar gyfer presgripsiynau o hyn ymlaen.

Bydd hawl gan gleifion sydd â misoedd heb eu defnyddio ar eu tystysgrif gyfredol i gael ad-daliad am y misoedd hynny.

Gan fod y bwriad i roi presgripsiynau am ddim wedi'i gyhoeddi y llynedd, cafodd cleifion gyfle i benderfynu pa fath o dystysgrif y dylent ei phrynu, fel na fydd angen rhoi llawer o ad-daliadau.

Fodd bynnag, mae'n dal yn bosibl i gleifion o Gymru nad ydynt yn gorfod talu am bresgripsiynau o dan y system eithrio feddygol neu famolaeth gyfredol wneud cais am dystysgrif fel y gallant gael eu meddyginiaeth o fferyllfeydd cyflenwi yn Lloegr, os mai dyna fel y maent wedi arfer gwneud.